BAGUIO CITY – Manamnama a malpas ti negotiation process iti bid parameters iti Baguio City Public Market Redevelopment inton Setyembre a tres ita a tawen.
Iti panakiuman ti Bombo Radyo kenni Engineer Bonifacio Dela Pena, City Administrator iti siudad ti Baguio, impasiguradona a malpas ti negosasyon iti naituding a deadline naballigi man wenno saan gapu ta dumanonen iti lima a tawen idi nangrugi a mapanggep ti panakaiyimplimintar daytoy.
Sigun kenni Engr. Dela Pena, atiddog pay ti proseso a pagdalanan ti nasao a proyekto nangruna ta nabaliwan ti ruling iti Public Private Partnership (PPP) Center nu sadino adda dagiti nainayon ken adda dagiti naikkat iti terms of negotiation.
Kagiddan dayta, nilawlawagan ti opisyal nga awan ti kinaagpayso dagiti sayangguseng a naipaiman ti merkado publiko iti primeholdings ti nalatak a mall.
Pinasingkedan ni Engr. Dela Pena, a ti Baguio City ti mangpataray iti merkado saan a ti nasao a mall.
Malaksid iti dayta, kinunanna a ti pribado nga entity ket agserbi laeng kas katulungan para iti nasao a proyekto iti panakamintinir daytoy.
Iti sabali a bangir, impasigurado ti City Administrator a maipaayan ti temporary relocation area partikular idiay Slaughter dagiti vendors inton maipatungpal ti redevelopment tapno saan a mataktak ti panagnegosyo dagitoy.//Bombo Rob Dominguez
