BAGUIO CITY – Nakemmeg ti maysa a newly-identified drug personality iti buy-bust operation nga insayangkat dagiti otoridad sadiay Balikangkang, Ampucao, Itogon, Benguet idi kanikadua.
Nabigbig daytoy a ni Marlon Kiyay Nonog, 38-anyos, baro ken residente ti nasao a lugar.
Immuna nga inlakona iti nakatransaksionna nga operatiba ti maysa a pakete ti maatap a shabu nga agdagsen ti 0.18 grams.
Kalpasan a nakemmeg ket nakumpiskar kenkuana ti kanayonan a lima a pakete ti maatap a shabu malaksid iti nagduduma a drug paraphernalia ken ti cellphone nga inaramatna iti transaksion.
Narekober pay kenkuana ti naaramat a buy-bust money.
Naisayangkat ti operasyon babaen iti nagtipon a pwersa ti Itogon Municipal Police Station, Provincial Intelligence Unit ti Benguet PPO ken dadduma pay nga operatiba.
Sumangsango metten daytoy iti kaso a panaglabsing iti RA 9165 wenno Comprehensive Dangerous Drugs Act of 2002.
