BAGUIO CITY – Naipaay kadagiti sumagmamano nga illegal settlers wenno squatters nga agnanaed kadagiti nagduduma a military reservation iti siyudad ti Baguio ti “Notice to Vacate.”
Maibasar iti naipablaak a surat, naipaayan iti 30 nga aldaw dagiti illegal settlers/squatters nga umikkat iti masakupan ti military reservation.
No saaan dagitoy nga agtulnog ket mapilitan ti Philippine Military Academy nga administrator ti Armed Forces of the Philippines a mangpaikkat kadagiti illegal settlers/squatters babaen iti judicial wenno administrative process.
Iti panakiuman ti Bombo Radyo iti maysa nga agnanaed sadiay Camp Allen Military Reservation, inyebkasna a saanna a ninamnama ti panakapaikkat kadagitoy gapu ta nasurok sangapulo ket maysa a tawen nga agnanaed-da iti military reservation.
Kabayatanna, iti naipatungpal a Dialogue on Land Disputes iti siyudad ti Baguio idi bulan ti Abril, inlawlawag ni LTC Julesther Cañada PA, Real Estate Officer manipud PMA a maibasar iti records dagitoy, tinubngarda dagiti pannakaipasdek dagiti sumagmamano a building structures kadagiti nagduduma a military reservations.
Innayon ni Cañada a dagiti nasao a masakupan ti military reservation ket adda ti pakausaranna base iti AFP ken National Military strategic defense.
