Imbinglay ni Marlene Bandos, maysa nga Overseas Filipino Worker (OFW) idiay Jerusalem, a nasayaat paylaeng ti kasasaadda iti nasao a lugar.
Daytoy ket iti tengnga iti kanayon a panagturongda kadagiti bomb shelter, nangruna nu aguni ti “siren” iti lugarda kas balakad a kasapulanda nga aglemmeng.
Iti pannakiuman iti Bombo Radyo Baguio, inyestoriana a nu ag-alarm dagiti selpon da, kasapulan a dagos nga agturongda iti bomb shelter, nangruna nu kagiddan daytoy iti panaguni iti sirena.
Kadawyan nga agtaltalinaedda iti agarup sangapulo a minutos, ken rumrummuarda laeng nu adda ti pakaamo iti selpon da a natalgeden.
Aklonen ni Bandos a makarikrinada metlaeng iti buteng kadagiti mapaspasamak, isu’t gapuna a kasapulanda nga aglemmeng tunggal adda ti balakad.
Sigun kenkuana, manmanoda laeng a rummuar. Kadawyan ket tunggal Biernes iti malemda laeng a rummuar, bayat a ti day-off dagitoy ket tunggal Sabado iti rabii.
Imbinglay metlaeng ni Bandos nga awan pilpilyen a lugar dagiti panagbomba, gaputa iti nagduduma a paset iti Israel ken Jerusalem ti matamaan, karaman dagiti holy site ken dagiti mosque dagiti Muslim. Gapu iti daytoy, delikado paylaeng ti panagpagna iti ruar.
Idi nadamag seknan iti panaggatangda iti taraon, imbinglay ni Bandos a gumatgatangda laeng iti “bultuhan” tapno maminsanda laeng a rummuar ken ag-stock.
Iti agdama, suspendido paylaeng dagiti klase iti amin a lebel idiay Jerusalem.
Nu maipapan met iti transportasion, normal paylaeng ti garaw, ngem nu maminsan ket maad-addaan iti delay, nangruna kadagiti train ken bus. Kabayatanna, nakaserra paylaeng dagiti tiendaan iti souvenir.
Iti baet iti kasasaad, kinuna ni Bandos nga awan ti panggepna nga agawid iti Pilipinas.
Kinunana a pilitenna paylaeng nga agtalinaed gaputa adda paylaeng ti pagad-adalenna nga estudiante, ken lima pay a tawen ti nabatbati a kontratana.
