Inwaragawag ti University of the Philippines Marine Science Institute (UP MSI) a posible a madanon ti oil spill a napasamak iti limned a Motor Tanker (MT) Terranova iti taaw ti Limay, Bataan ti Metro Manila inton bigat.
Daytoy ket kas maibasar iti bulletin ti University of the Philippines Marine Science Institute a nakabasar iti oil trajectory model a mangar-aramat iti surface velocity fields manipud Global Ocean Physics Analysis and Forecast ken surface winds manipud National Center for Environmental Prediction Global Forecast System.
Sigun kenni Cavite Governor Jonvic Remulla, dimmanonen iti nagduduma a coastal barangays iti probinsya ti oil spill a pakairamanan ti Ternate, Maragondon, Naic, ken daduma a paset ti Tanza.
Kinumpirmar met ti Philippine Coast Guard a siyam kadagiti tangke ket agleleak nupay kasta, dagus daytoy a naselyoan bayat nga agtultuloy ti panagmonitorda iti daytoy.
Maipalagip a limned ti MT Terranova idi napalabas a Huwebes idiay Limay, Bataan nu sadino addaan daytoy iti 1.4 million a litro ti industrial fuel oil.
