BAGUIO CITY- Pagyamyamanan ita dagiti commuter manipud Cordillera ti Libreng Sakay a programa ti Land Transportation Franchising and Regulatory Board (LTFRB).
Sigun kenni Egin, maysa a commuter, P600 ti main-inotna tunggal bulan gapu iti nasao a programa.
Kinunana nga imbes a pagpletena ti nasao a gatadna ket impatulodna iti pamilyana.
Gapu iti daytoy, kidkiddawenna a mailaylayon pay ti Service Contracting Program tapno ad-ado pay ti padana a communters a matulongan ti programa.
Ti service contracting program ket ipatpatungpal ti Department of Transportation (DOTr) ken Land Transportation Franchising and Regulatory Board (LTFRB) kas maitunos iti marching order ni President Rodrigo Duterte tapno masupusupan ti pagkasapulan dagiti commuter, operator ken driver.
Maibasar iti datus ti LTFRB-Cordillera, nasuroken iti maysa a milyon a pasahero wenno commuter iti rehion ti nagnumar iti Libreng Sakay.
