BAGUIO CITY – Patien ti ama ti Baguio a ti agdama a tawen, 2022 ti “banner” year para iti panagrekober ti siudad iti baet ti saan a napintas a panagrugi ti tawen gapu iti baro nga Omicron variant ti COVID-19.
Sigun kenni Mayor Benjamin Magalong, adu a developments ti nakasagana a maaramid ita a tawen a manamnama a mangipakita iti panagrekober ti siudad manipud kadagiti nagbalin nga epekto ti health crisis.
Kinunana nga iti baet ti panagngato manen ti kaso ti COVID-19 ket adu latta ti nasken a padaanan nangruna ta manamnama ti panagrekober ti siudad gapu iti implementasyon dagiti sumagmamano a priority development projects.
Dinakamatna a dagitoy ket trinabaho ti lokal a gobyerno iti napalabas a tallo a tawen ken matungpal babaen iti Public-Private Partnership Program ken iti tulong ti nasyonal a gobyerno ken dagiti international partners ti Baguio.
Manamnama a makapataud dagiti proyekto iti nasurok dua ribo a panggedan.
Karaman kadagiti nasao a proyekto ti sports complex iti Baguio Athletic Bowl, konstruksion ti isolation facility ken outdoor facilities para iti wall climbing ken skate park; ti panakapasayaat dagiti parke iti siudad ken dadduma pay.
Karaman pay iti sidong ti Public-Private Partnership ti city market development; inter-modal transport facility; konstruksion ti abattoir nga addaan ti cold storage facility; panaka-aramid ti glass walk iti Mines View Park; cable car ken elevated monorail ken ti smart city mobility system.
Naituding met a maipasidong iti bidding ita a tawen ti sewerage system rehabilitation a maysa kadagiti kangrunaan a proyekto ti lokal a gobyerno.
