Dawdawaten ni Occidental Mindoro Gov. Eduardo Gadiano ken dadduma pay a lokal nga opisial ti panagkaykaysa ken kappia gapu iti riri a mapaspasamak iti sigud nga UniTeam.
Impeksa dagiti lokal nga opisial ti San Jose, Occidental Mindoro ti suportada iti takder ni President Ferdinand Marcos Jr, kontra iti impeachment ni Vice President Sara Duterte, a sumangsango iti tallo nga impeachment complaint iti House of Representatives.
Kinunada a ti “impeachment proceedings” — maysa a wagas ti panagsungbat nga impalubos ti 1987 Constitution — ket makaapektar iti ekonomia ti pagilian a Pilipinas ken ti imahe daytoy iti ballasiw-taaw.
Sigun kenni Gov. Gadiano, ti impeachment ket gapuanan ti pannakabingay dagiti tattao, ken amangan a pananunuten dagiti dadduma a makilablaban dagiti dadaulo ti Pilipinas.
Gapu iti dayta, kinunan a suportaanda ti kiddaw ni President Marcos a mangpasardeng iti impeachment.
Ni Vice President Duterte ket sumangsango iti alegasion seknan iti panagaramat ti confidential funds a nailatang iti Office of the Vice President idi 2022 ken ti Department of Education idi 2023.
Inlibak met daytoy ni Vice President Duterte ken inawaganna dagitoy a “politically motivated.”
