BAGUIO CITY – Napunnon dagiti pagagasan sadiay Bontoc, Mountain Province gapu iti panagngato ti kasoda iti COVID-19 kasaruno ti panakailista sadiay ti kaunaan a kasoda ti Omicron variant.
Iti panakiuman ti Bombo Radyo Baguio, kinuna ni Bontoc Mayor Franklin Odsey a gapu iti daytoy ket na-activate ita dagiti Temporary Treatment and Monitoring Facilities (TTMFs) ti munisipyo.
Kinunana a babaen iti daytoy ket mawayaan dagiti pagagasan sadiay, partikular ti Bontoc General Hospital.
Innayonna a naituding a ma-renew ti kontrata ti municipal government ken ti Department of Education tapnu maaramat manen dagiti pagadalan sadiay kas isolation facilities.
Immuna a nawaswas ti katulaganda iti nasao nga ahensia kasaruno ti panakaisagana dagiti pagadalan sadiay a naaramat iti implementasyon ti face-to-face class.
Innayonna a nainget latta ti panangpalagipda kadagiti umili sadiay Bontoc iti panagtungpal dagitoy iti minimum public health standards, pakairamanan ti panagpabakuna kontra iti COVID-19.
Iti agdama, dumanonen iti 142 ti aktibo a kaso ti COVID-19 sadiay Bontoc, Mountain Province bayat a nailista ti Bontoc General Hospital ti 44.44% a bed utilization rate ken 44.62% a health utilization rate.
Epektibo met inton bigat, Pebrero 1-15 ket maipasidong manen ti Mountain Province iti Alert Level 3.
