Agtuloy ladta ti panangipaay dagiti otoridad iti arrest warrant kontra kenni Pastor Apollo Quiboloy iti laksid ti impaulog a temporary protection order ti korte ti Davao kenkuana.
Sigun kenni Department of Justice Jesus Crispin Remulla, ti naipila a writ of amparo kontra kadagiti pulis ket saan nga agepektibo gapu ta ti korte ti mismo a nangbilin a maarestar ti nasao nga indibidual.
Gapu iti dayta, saanda nga agsurrender iti korte ken ituloyda ti panangipaayda iti arrest warrant kontra kenni Quiboloy.
Impeksa ni Remulla a ti court order a nairuar ket “moot ken academic” wenno impractical.
Maibasar iti website ti Supreme Court, ti writ of amparo ket maipapan iti remedio a maipapaay iti maysa nga indibidula nu ti karbenganna iti biyag, panakawaya-waya ken seguridad ket nalabsing.
Nu pay kasta, inkalintegan ni Remulla a ti operasyon dagiti pulis iti Kingdom of Jesus Christ compound ket valid bayat nga inyebkasna a saanda a sardengan daytoy iti laksid ti nangato a saadna iti biyag.
Maipalagip nga idi Martes ket nangipaulog ti Davao Regional Trial Court iti temporary protection order a nakapabor iti Kingdom of Jesus Christ a mangbilbilin kadagiti pulis nga isardengda ti aksyonda a mangituntunda iti pangta kadagiti miyembro ti Kingdom of Jesus Christ.
