BAGUIO CITY – Napapatay ti overall chairman ti Communist Party of the Philippines-New People’s Army (CPP-NPA) ken ti dua pay a kadwana idi limmabanda iti tropa ti gobyerno a mangiserbi kuma iti warrants of arrest ken search warrant iti balayna sadiay Hamada Subd., Lourdes Subd. Extension, Baguio City idi alas-3:30 iti parbangon kalman, March 13.
Nabigbig daytoy a ni Julius Soriano Giron alias Terro/Zoilo/Tatay/Lakay, miyembro ti political bureau ken chairman ti National Military Commission ti CPP-NPA malaksid pay a nadutokan idi 2014 kas overall chairman ti CPP-NPA kasukat ti nakemmeg a ni Benito Tiamzon ken daytoy pay ti dadaulo ti CPP-Northern Luzon Commission.
Maibasar iti report, iserbi kuma dagiti nagtipon a pwersa ti National Capital Region Police Office, Police Regional Office Cordillera, Baguio City Police Office ken AFP-Northern Luzon Command ti search warrant ken uppat a warrants of arrests kontra kenni Giron.
Nupay kasta, pinalpaltogan ni Giron ken dagiti kakadwana dagiti operating troops a nagresulta iti engkwentro ken iti ipupusay dagitoy.
Nabigbig dagiti dua pay a pimmusay a da Lourdes Tan Torres/Ma. Lourdes Dineros Tangco alyas Tita, miembro ti CPP Executive Committee ken Arvie Alarcon Reyes nga agserserbi kas security aide ni Giron ken miembro metlaeng ti CPP-NPA Northern Luzon.
Inyetnag ni National Capital Judicial Region 2nd Vice Executive Judge Ferdinand Baylon ti search warrant gapu iti kaso ni Giron a panaglabsing iti Comprehensive Firearms and Ammunition Regulation Act bayat a dagiti uppat a warrants of arrest ket para kadagiti kaso ni Giron a rebellion, dua a bilang ti murder, arson ken frustrated murder.
Narekober pay manipud iti balay ti maysa nga M-16 rifle ken dua a caliber 45 a bin-ig nga addaan bala, tallo a hand grenades, maysa a magazine ti M-16 a naglaon ti bala ken gadgets.
Nadiskobre pay a ti balay ket tagikua ni Giron a nagatang babaen iti cash a maibagbaga a maysa kadagiti pribelehiyo para laeng kadagiti nangangato a lider ti CPP-NPA ken front organizations daytoy.
Kinuna met ni Armed Forces of the Philippines Chief-of-Staff General Felimon Santos Jr. a ti panakapapatay ni Giron ket ad-adda a mangpakapoy iti komunista a grupo.
