BAGUIO CITY – Posible a maaddaan ti over supply kadagiti nateng inton Marso gapu iti in-inot a panagbalin a normal ti suplay ken presyo dagiti natnateng sadiay kadagiti trading centers ti nateng sadiay La Trinidad, Benguet.
Iti interview ti Bombo Radyo Baguio, kinuna ni Agot Balanoy, panakabagi ti liga dagiti asosasyon iti La Trinidad Vegetable Trading Post nga immado ti suplay dagiti natnateng ken bimmaba ti presyo dagitoy no idilig iti napalpalabas a bulan.
Kinunana a nag-rehab dagiti mannalon kadagiti mulada a nateng kalpasan ti napasaran a bagyo isut gapu nga adu ita dagiti nag-apit.
Inlawlawagna a pimmartak ti maturity dagiti leafy vegetables gapu iti mapaspasaran a panagtudo ken aggi-giddan ti panag-apit dagiti mannalon nga agresresulta iti adu a suplay dagiti nateng kadagiti trading centers.
Innayonna a gapu iti adu a suplay ken bimmaba a presyo dagiti nateng ket kabaelanen dagiti vegetable buyers a manggatang kadagiti nateng a katukad ti ngimmato a pagkasapulan ti nateng.
Mainaig iti dayta, imbinglayna nga agtultuloy ti panakasurot dagiti health and safety protocols kontra iti COVID-19 kadagiti trading areas ti nateng sadiay La Trinidad kasaruno ti panakailista ti kaso ti UK variant ti COVID-19 iti nasao nga ili.
Kinuna ni Balanoy nga iti baet ti saan a nainget a panakaipatungpal ti panagaramat ti face shield iti La Trinidad Vegetable Trading Area ket maobserbaran latta nga adu dagiti agar-aramat iti daytoy.
