Nangilatang ti administrasion ni Marcos iti P1.2 milyon a gatad iti tulong kadagiti Pilipino a naapektaran ti bagyo nga Aghon, sigun mismo kenni President Ferdinand “Bongbong” Marcos Jr. ita nga aldaw.
Malaksid iti dayta, insagana pay ti gobierno ti P3 bilyon kas “standby funds” ken kas “prepositioned goods” ken “stockpiles” tapno masigurado ti nalawlawa ken naparpartak a relief a maipaay kadagiti naapektaran.
Idi laeng kalman, nagpakdaar ni President Marcos Jr., nga agridam ken ipangpangruna ti kinatalged gaputa agtultuloy latta a mapaspasaran ti bagyo nga Aghon iti pagilian.
Imbilinna pay kadagiti local government units (LGU), “emergency services”, ken dadduma a maseknan nga ahensia nga imonitorda ti sitwasion ken mangipaay ti naan-anay a tulong pakairamanan iti makan ken saan a makan kasta met iti “health services”.
Iti agdama, nakaibayog ti Signal No. 2 iti southeastern portion iti Isabela (Dinapigue, Palanan), ken northern portion ti Aurora (Dilasag, Casiguran).
Agtultuloy nga agargaraw ti bagyo iti direksion a “northeastward” iti Philippine Sea.
Nakaibayog metlaeng ti Signal No. 1 iti sumagmamano a lugar iti Luzon area.
Nasuspindir metten ti “in-person classes” iti sumagmamano a pagadalan ita nga aldaw gapu iti bagyo nga Aghon.
