BAGUIO CITY – Impalagip ti dadaulo ti Transport Group iti Cordillera ken Region 1 nga ag-epektibon ti panagngato ti plete kadagiti parapubliko a lugan inton lunes, Oktobre 3.
Iti interview ti Bombo Radyo, kinuna ni Pat Evangelista, P12 ti ngumatoan ti minimum a plete kadagiti traditional jeep bayat a P14 met kadagiti modernized a jeep.
Nupay kasta, impeksa ni Evangelista ti panakadismayana iti pammilin ti Land Transportation Franchising and Regulatory Board (LTFRB) a saan a mabalin nga agsingir ti kanayonan a plete dagiti driver ti jeep nga awanan ti fare matrix.
Impettengna a nangina unay ti P610 a singir ti LTFRB kadagiti tunggal yunit ti jeep nga agala ti fare matrix nu idilig iti sigud a P520.
Kabayatanna, inlawlawag met ti LTFRB a ti “NO FARE MATRIX, NO FARE INCREASE” a polisiya dagitoy ket tapno maliklikan ti abusado a panagsingir dagiti driver ti nangato a plete.
Inlawlawag pay ti LTFRB a ngimmato ti mabayadan nu agala ti farematrix tapno masupusopan ti legal fees ken daduma pay a gastos ti ahensiya iti panangiprosesoda ti farematrix.
