BAGUIO CITY – Narekober ti P120-K a gatad ti marijuana iti maysa a motorcycle rider kabayatan ti checkpoint operation dagiti otoridad sadiay purok 3 Bulanao, Tabuk City, Kalinga itay nabiit.
Agtawen ti suspek iti 24, maysa a construction worker, tubo ti Masbate City ken mabigbigbig kas Street Level Individual (SLI) drug personality ti Tabuk City Police Station.
Nakumpiskar manipud kenkuana ti maysa a brick ti maatap a marijuana dried leaves ken stalks nga agdagsen ti nasurok kumurang 950 a gramo nga aggatad iti P120-K.
Nakumpiskar metlaeng manipud iti suspek ti maysa a black android samsung phone ken maysa a lugan nga awanan ti plate number.
Naiturong ti suspek iti kustodiya ti Tabuk City Police Station para iti dokumentasion bayat a maisagsagana metten ti kasona a panaglabsing iti Section 11 (Possession of Dangerous Drugs), Article 11 ti Republic Act 9165 wenno ti Comprehensive Dangerous Drugs Act of 2002.
