BAGUIO CITY – Nakaawat ti lokal a gobierno ti Baguio City iti P13 million manipod iti Department of Public Works and Highways para iti naan-anay a pannakatarimaan, pannakapapintas ken pannakanayun ti bed capacity kadagiti isolation units tapnu maipasigurado ti umdas nga espasyo para kadagiti COVID-19 patients.
![](https://img.bomboradyo.com/baguio/2020/12/5edf479d9ab095dd823d4178_Untitled-presentation-92.jpg)
Sigun ken City Administrator Bonifacio dela Peña, maaramat ti pondo para iti pannakadoble ti agdama a bilang dagiti 228-bed capacity iti Roxas Hall, Hernandez Hall ken Superintendent’s Quarters sadiay Baguio Teachers Camp kas maysa iti strategic approaches nga ar-aramiden ti lokal a gobierno tapnu maipasigurado ti kinasagana dagiti isolation units iti kanito a ngumato manen ti bilang dagiti pasyente ti COVID-19 a kasapulan a maipasidong iti isolation.
Kinunana a puntirya ita ti lokal a gobierno a maipangato agingga 560 ti bed capacity ti isolation facility sadiay Baguio Teachers Camp babaen iti nasao a pondo.
Mainaig iti dayta, inmunan a nakaawat ti syudad iti P12 million baben iti DPWH nga isu ti maar aramat para iti pannakapadur-as ti 95-bed capacity sadiay Sto. Niño Hospital tapnu agbalin daytoy a 300 agingga 400 bed capacity.
Malaksid iti dayta, matartarimaan ita dagiti 12 a container vans a naisangpet ditoy syudad tapnu agserbi kas 24-bed capacity isolation unit a maimuntar iti central triage ti syudad sadiay Baguio Convention Center.
Inlawlawag ni de la Peña a maaramat ti nasao nga isolation unit para kadagiti kumpirmado a kaso ti COVID-19 a na-screen iti triage area ken kadagiti bisita nga agpaisidong iti maikalkalikagum a triaging sakbay a makastrekda iti city proper.