BAGUIO CITY – Impetteng ni Benguet Congressman Eric Go Yap a kasapulan a marugianen ti konstruksyon ti Pilando Cable-Stayed Bridge ken ti panakailukat ti Alternate Route iti Pilando Road iti kabiitan a panawen.
Sigun iti Kongresista, dagiti dua nga imprastrktura ti makitkitana a kasayaatan a solusyon para iti nasao a pakaseknan.
Iti baet a maysa a karit ti pagtaudan ti pondo para iti Pilando Cable-Stayed Bridge, impasigurado ni Cong. Yap nga agsarakda ti mabalin a pagtaudan ti maaramat a pondo tapno marugyanen ti konstruksyon ti Phase 1 inton sumaruno metlaeng a tawen.
Kinunana a dumanon iti P2.2-billion a pondo ti pata-patta ti Department of Public Works and Highways a maaramat para iti rangtay nu sadino daytoy ti agserbi kas permanente a solution.
Impasigurado met ti nasao nga opisyal ti panagsarakda ti pondo para iti road opening ti alternate route iti Pilando area.
Kagiddan dayta, kidkiddawen ni Cong. Yap ti panakitinnulong dagiti umili nangruna dagiti residente iti probinsya iti Benguet.
