BAGUIO CITY – Nadiskobre dagiti otoridad ti 158 a pidaso ti marijuana bricks ken tubular marijuana a nakakabil iti lima a sako a naabandona iti igid ti national road sadiay Iyukan, Mallango, Tinglayan, Kalinga idi kalman.
Mapattapatta nga agarup nasurok iti P20.64-M ti gatad dagiti nadiskobre a kontrabando.
Maibasar iti report ti Kalinga PPO, nakaawatda ti impormasyon nga iti tengngat rabii ti Biyernes, Enero 20 ket adda ti maibiahe a marijuana babaen kadagiti saan pay a nabigbig a lallaki ken agtaud ti kontrabando sadiay Tinglayan ken maidalan sadiay Tabuk City.
Gapu iti daytoy, nangibangon dagiti pulis iti checkpoint ken nabilinda a mangirteng iti panagala ti impormasyon ken panangwanawan iti masakupanda babaen iti mobile patrol.
Kabayatan ti panagpatrolya dagiti pulis ket nasarakanda dagiti lima a sako a naglaon kadagiti nabalkot a marijuana, partikular ti 158 a marijuana bricks ken 14 a tubular form ti marijuana.
Patien ti pulisya nga imbati dagiti drug couriers dagiti marijuana gapu iti presensia dagiti police checkpoints sadiay.
Maisaysayangkat met ti follow-up investigation para iti posible a panakabigbig ken panakatiliw dagiti naggandat a mangibiahe kadagiti kontrabando.
