LA TRINIDAD, BENGUET- Posible a mailako ti P20 tunggal kilo a bagas iti Munisipyo ti La Trinidad, Benguet.
Iti panakiuman ti Bombo Radyo kenni Mayor-elect ken agdama a vice Mayor Roderick Awingan ti La Trinidad, kinunana nga agkiddaw dagitoy iti national Government para iti suplay ti nasao a bagas no kabaellanda.
Babaen iti daytoy, manamnama a makaipaay iti benepisyo kadagiti vulnerable sectors iti nasao a munisipyo.
Impetteng ni Awingan a saanna nga iserra ti posibilidad a magatang ti P20 tunggal kilo a bagas iti Strawberry Capital of the Philippines iti baet a saan a rice producer ti Munisipio iti La Trinidad.
Maipalagip a target ti Department of Agriculture (DA) nga ipatungpal ti pannakailako ti P20 tunggal kilo a bagas agingga 2028.
Kasaruno daytoy iti direktiba ni President Ferdinand Marcos Jr. nga agpaut ti pannakailako iti nalaka presio ti bagas.
Sigun met kenni Agriculture Secretary Francisco Tiu Laurel Jr., agingga laeng iti Disiembre ita a tawen ti inisyal a plano dagitoy iti pannakailako ti P20 tungga kilo a bagas.//Bombo Genzel Depayso
