BAGUIO CITY – Umawat ti La Trinidad Municipal Police Station sadiay probinsia ti Benguet iti P350,000 a cash reward gapu iti panakapilida kas Best Municipal Police Station iti intero a pagilyan.
Sigun kenni Police Major Cleff Vencio, hepe ti pulisya ti La Trinidad, nagtaud ti nasao a gunguna iti personal a pondo ni Presidente Rodrigo Duterte ken nailatang kas panangbigbigna kadagiti naaramidan ti istasyonda.
Kinunana a maaramat ti gatad iti panakaibangon ti operation center ti La Trinidad Municipal Police Station para iti kalamidad ken iti COVID-19 contact tracing.
Impasiguradona met ti agtultuloy a pananagipatungpalda iti amin a best practices ti istasyonda ken ad-adda a pasayaatenda pay dagitoy nga aramid tapnu masustinir dagiti programada ken mamintinir ti linak ken kappia iti masakupanda a munisipyo.
Pinagyamanan pay ni Major Vencio dagiti umili ti La Trinidad, Benguet iti suporta nga impapaay dagitoy kadagiti program ti pulisya.
