BAGUIO CITY – Dinadael dagiti otoridad ti P41.2-M a gatad dagiti rinibribo a puon ti marijuana iti tallo nga aldaw nga eradication operation dagitoy sadiay Brgy. Loccong, Tinglayan, Kalinga.
Nangrugi ti nasao nga operasyon idi Miyerkoles, May 12 agingga ita nga aldaw, May 14 iti sidong ti Oplan May Hemp ti Barangay Drug Clearing Program ti PDEA-Cordillera ken Oplan Dragonfly ti Kalinga Police.
Nadiskobre dagiti operatiba ti maysa a pagmulaan nga addaan kalawa a walo a ribo a metro kwadrado ken sadiay a pinarutda ti agarup nasurok 80,000 a puon ti marijuana nga aggatad ti P16-M.
Nadiskobre pay dagitoy ti 210 a kilo dagiti naapiten ken napagango a puon ti marijuana nga aggatad ti P25.2-M.
Inuram dagiti operatiba dagiti nasao a kontrabando malaksid kadagiti inalada nga agserbi nga ebidensia.
Awan met ti natiliw a marijuana cultivator kabayatan ti operasyon.
Immuna metten nga inkari dagiti personnel ti PDEA ken PNP nga itultuloyda ti panangisayangkat ti marijuana eradication operations iti Cordillera tapnu madalusan ti rehion manipud iti iligal a mula kas maitunos iti kampanya ti gobyerno kontra iti iligal a droga.
