BAGUIO CITY – Intaray dagiti saan pay a nabigbig a suspek ti P40-K ti gatadna a kagawaan ken P5,000 a cash manipud iti pagtagilakuan sadiay Betag, La Trinidad, Benguet.
Maibasar iti report ti La Trinidad MPS, nabigbig dagiti biktima a da Jacqueline Saguid, 58-anyos, residente ti Wangal, La Trinidad ken Danilo Canela, 58-anyos ket residente ti Baguio City.
Sigun iti imbestigasyon, pwersado a dinadael dagiti dua a suspek ti stainless nga alad nga agserserbi kas entrance ken exit ti store.
Ditoy a dinadaelda ti pagtagilakuan ti plywood ken galvanized iron a tagikua ni Saguid ken inala dagiti suspek ti sumagmamano nga assorted goods nga aggatad iti agarup P30-K.
Dinadael metlaeng dagiti suspek ti roll-up door ti store a tagikua ni Canela ken naala metlaeng dagiti sumagmamano nga assorted goods nga aggatad ti P5,000 ken P10-K a cash a naikabil iti maysa a wooden jar.
Manarimaan paylaeng ti panakabigbig dagiti suspek babaen iti tulong ti CCTV footage.//DanteGuittu
