BAGUIO CITY – Pinarut ken inuram dagiti otoridad ti 2,550 a fully-grown marijuana plants nga aggatad ti P530,000 iti dua a disso sadiay Poblacion, Kibungan, Benguet.
Nadiskobre ti mapattapatta a 2,500 fully-grown marijuana plants iti maysa a lote nga aglawa iti 500 square meters bayat a simmaruno a nadiskobre ti 50 a fully-grown marijuana plants iti sabali manen a lote nga aglawa iti 600 square meters.
Inuram metlaeng dagiti otoridad ti 350 a fully grown marijuana plants nga aggatad ti P70,000 kalpasan a pinarutda dagitoy iti lote nga addaan kalawa a 70 square meters sadiay Ileb, Nambaran, Tabuk City, Kalinga.
Nadiskobre ti marijuana plantation site babaen iti impormasyon a naidanun iti hepe ti Tabuk City Police Station.
Nupay kasta, agpada nga awan ti nakemmeg a marijuana cultivators kadagiti dua nga operasyon sadiay Benguet ken Kalinga.
Kabayatanna, narekober ti uppat a marijuana bricks ken dua a tubular marijuana nga aggatad amin iti P576,000 sadiay Kesat, Bontoc Ili, Bontoc, Mountain Province.
Naikabil dagiti nasao a kontrabando iti dua a blue bags.
