Kibungan, Benguet- Mapatta-patta a dumanon iti P60,000 a gatad ti fully grown marijuana plants ti nadiskobre dagiti otoridad idiay Sitio Bito, Tacadang, Kibungan, Benguet idi laeng kalman, Setiembre a otso.
Daytoy ket babaen ti panangidaulo ti Kibungan Municipal Police Station kaduada dagiti kameng ti Benguet Provincial Police Office, Police Regional Office-Cordillera, ken dadduma pay a yunit iti naisayangkat a marijuana eradication.
Nagresulta ti operasion iti pannakadiskobre ti maysa a plantasion ti marijuana iti communal forest nga addaan iti mapatta-patta a kalawana a dumanon iti innem a pulo nga square meters nga addaan ti mula a tallo gasut a pidaso ti fully grown marijuana plants.
Dagos met a pinarot ken inuram dagiti operatiba ti nadiskobre a marijuana plants iti nasao a lugar a nakaimulaan dagitoy ken nangalada ti umdas a “sample” tapno isubmitir iti RFU-CAR para iti qualitative test.
Ti nasao nga addang ket kas panagsuporta iti agdama nga administrasion nga addaan panggep a pagbalinen nga “illegal drug free” ti pagilian a Pilipinas.
