Naikeddeng a nainget nga ipatungpal ti Commission on Elections (Comelec) dagiti pagannurotan maipapan kadagiti campaign materials iti sidong ti kampaniada nga “Operation Baklas” kagiddan ti opisial a panangrugi ti kampania para kadagiti national position iti Eleksyon 2025 inton Martes, Pebrero 11, 2025.
Impaganetget ni Comelec Chairman George Garcia nga ikkaten dagiti lokal nga opisina ti Comelec dagiti campaign materilas a saan a maitunos iti limitasion ti kadakkel wenno naipaskil kadagiti saan nga otorisado a parapubliko nga espasio.
Mangisayangkat metlaeng ti nasao nga ahensia ti naing-inget nga addang kontra iti vote-buying ken vote-selling.
Maguyguyuguy met ti publiko a mabalin nga ireportda iti Committee on Kontra-Bigay babaen ti ladawan wenno video dagiti aglablabasing iti pagannurutan.
