Nakasagana a tumulong ti pagilian a Pilipinas idiay Myanmar ken Thailand kalpasan ti 7.7 magnitude earthquake a napasamak idi kalman.
Gapu iti dayta, inbilin ni Health Secretary Teoedoro Herbosa kadagiti tallo a Philippine Emergency Medical Assistance Teams (PEMAT) nga agsagana dagitoy para iti pannakaideployda sadiay Thailand apaman a makompleto ti international coordination protocols.
Sigun kenni Herbosa, agtultuloy ti koordinasion dagitoy iti opisina ni President Ferdinand Marcos Jr. para iti pammilin.
Kabayatanna, kinuna ti Department of Health a dagiti tallo a Philippine Emergency Medical Assistance Teams nga agtaud iti Metro Manila, Luzon ken Visayas ket mangipaay iti daylight hours care para iti acute trauma, non-trauma presentations ken dadduma pay.
Mangipaay metlaeng dagitoy iti health investigation ken community-based primary care kadagiti outpatient fixed facility.
Maipalagip a nangipaay metlaeng iti tulong ti PEMAT sadiay Turkey kalpasan ti napasamak a gingined idi 2023.
