BAGUIO CITY – Kasapulan ti umdas a paradaan ditoy siudad ti Baguio tapnu mangakomodar iti umad-adu a lugan nga agturturong iti lokalidad.
Inyunay-unay daytoy ni Councilor Benny Bomogao, chairman ti Committee on Public Utilities, Transportation, and Traffic Legislation iti lokal a konseho ti Baguio iti panakiyuman ti Bombo Radyo Baguio.
Sigun kenkuana, agkurkurang dagiti paradaan ditoy siudad a mangakomodar kadagiti lugan.
Kinunana a karit ita iti lokal a gobyerno ti implementasyon dagiti linteg ken programa a mangipapaay iti solusyon iti nasao a pakaseknan.
Dinakamatna a kasapulan a mairtengan ti implementasyon ti ordinansa a mangikalkalikagum iti panangisubli dagiti business establishment iti parking area dagitoy a pinagbalinda a commercial spaces.
Imbingayna nga arigna nabaybay-anen dagiti singasing ken proposals iti lokal a konseho seknan iti panakaisimpa dagiti nagduduma nga espasyo ditoy siudad tapnu maaramid a paradaan ti adu a lugan.
Nupay kasta, linawlawaganna a mabalin met latta a mabiag dagiti nasao a singasing ken umawatda manen ti baro a proposal tapnu maadal iti lokal a konseho.
