BAGUIO CITY – Agtultuloy ti imbistigasyon ti Atok Munisipal Police Station (Atok MPS) iti pakabigbigan ti suspek iti pammaltog sadiat Km. 28, Caliking, Atok, Benguet idi pay Pebrero 8.
Iti interview ti Bombo Radyo Baguio ken Atok MPS Chief of Police PMAJ Gregorio Kiwalan, awan pay ti pakabigbigan dagiti suspek a nangpalpaltog iti maysa a truck driver agingga iti agdama
Immunan a nabigbig ti biktima a ni Crisanto Pias Kiblasen, 27-anyos, baro ken residente ti Sadsadan, Bauko, Mountain Province.
Maibasar iti report ti Atok MPS, manarimaan ti panagbiahe ti biktima ken dua a kasinsinna paturung sadiay Pangasinan tapnu agala ti abono.
Nupay kasta, apaman a nakasangpetda iti nakapasamakan ti insidente ket killaat nga adda ti brown nga SUV a nangserra iti kalsada a rason tapnu sumardeng ti truck.
Kalpasanna, immasideg iti truck dagiti tallo nga armado a lallaki ken imbilinda a bumaba ti biktima ken dagiti dua a kasinsinna.
Apaman a nakababa dagiti tallo, imbilin ti maysa kadagiti suspek a tumaray dagiti dua a kasinsin ti biktima sakbayda a pinalpaltogan ti mismo a biktima.
Nagsagrap ti biktima iti adu a tama ti bala ti paltog a nangitunda iti ipupusay daytoy.
Sigun pay iti Atok MPS, idi 2019 ket natiliw ti biktima iti buy-bust operation iti siudad ti Baguio ngem naibasura ti kaso daytoy.
