BAGUIO CITY – Narisut ken napagsasaritaanen dagiti BLISTT Mayors ti isyu ken saan a pagkikinna-awatan mainaig iti border control restrictions ti lokal a gobyerno ti Baguio.
Iti naisayangkat a close door meeting dagitoy idi kalman, nagbalin a mediator ni NEDA-Cordillera Regional Director Milagros Rimando.
Inlawlawag ti maysa ken maysa dagiti bukodda nga arungaing mainaig iti border control kalpasan a nagbalin daytoy a nabara a topiko kadagiti umili ken kadagiti netizens.
Sigun kenni Mayor Benjamin Magalong, adda dagiti saan a napagkikinna-awatan dagiti BLISTT members kadagiti immuna a tallo a konsultasyon a nangitunda iti saan a nalawag a pannaka-awat iti pagalagadan.
Kinunana a posible a nagkurang ti panaka-awat ken panakaidanun dagiti impormasyon mainaig kadagiti naangay a konsultasyon.
Nupay kasta, napanunot dagiti mayor ti personal a panagsasarita tapnu dagitoy a mismo ti agtutungtong ken mailawlawag a nalaing ti bennegda.
Innayonna nga agtultuloy latta a maimplimentar ti nasao a border restriction agingga intun December 4.
Dinakamatna a kalpasan ti nasao a taripnong ket nailawlawag ti umno nga puntirya ti restrictions.
Sigun pay kenkuana, immanamong dagiti mayor iti panagbibinnadang tapnu maipatungpal dagiti restrictions ken maliklikan pay ti panagngato ti kaso ti COVID-19 iti entero a Benguet.
Kabayatanna, tinagiragsak met ni La Trinidad Mayor Romeo Salda ti resulta ti nasao a taripnong ken kinunana a maawatandan ti nagbalin a desisyon ni Mayor Magalong kalpasan a nagpalawag daytoy.
Kinunana a dakkel ti nagbalin nga epekto ti personal a taripnong tapnu mailawlawag dagiti isyu pakairamanan ti kangrunaan a reklamo dagiti residente mainaig iti medical clearance.
Linawlawaganna a ti kasapulan ket medical clearance, saan ket a medical certificate.
Gapu iti daytoy, immanamongda a kasapulan ladta dagiti medical clearance iti panagturong iti Baguio dagiti umili dagiti nabigbig a munisipyo ken ti naited a clearance idi November 20 ket epektibo agingga inton December 4.
