Maipampannakel latta ti pambato ti Baguio City a ni Miss Gwendoline Soriano iti naangay a Miss Universe Philippines iti Mall of Asia Arena idiay Pasay City idi kalman.
Daytoy ket kalpasan a nakastrek ni Soriano iti top 12 kaduana dagiti pambato ti Sultan Kudarat, Quirino, Pasay, Quezon Province, Taguig, Laguna, Muntinlupa, Bohol, Cebu City, Iligan City, ken Siniloan, Laguna.
Immuna a nakastrek iti top 24 ni Soriano kaduana ti pambato ti Ifugao a ni Valerie Pawid West, ken pambato ti Benguet a ni Maiko Ibarde, ken dadduma pay, ngem saan a naala iti top 12 da West ken Ibarde.
Kabayatanna, dagiti nakastrek iti top 6 ket ti pambato ti Sultan Kudarat, Muntinlupa, Taguig, Cebu City, Quezon Province, ken Siniloan, Laguna.
Ti nakagun-od ti korona ket ti pambato ti Quezon Province a ni Maria Ahtisa Manalo.
Ibagi ni Manalo ti pagilian a Pilipinas iti maika-pito pulo ket uppat a Miss Universe pageant a maangay sadiay Thailand inton Nobiembre, iti agdama a tawen.
