BAGUIO CITY – Dakkel ti panagyaman ti pamilya Dormitorio iti Namarsua gapu ta naipaay ti hustisya iti panakapapatay daydi Cadet 4th Class Darwin Dormitorio kalpasan ti lima a tawen.
Iti exclusive interview ti Bombo Radyo kenni Dexter Dormitorio, kabsat ti kadete, kinunana a kasla naikkatan ti sibubukel a pamilya ti siit iti nagbalin a desiyon ti korte, manipud iti panagsagabada idi napalpalabas a tawen nupay man nasakit paylaeng daytoy.
“Very grateful kami at nabigyan ng hustisya si Darwin”
Dexter Dormitorio, Kapatid ni Darwin Dormitorio
Maipalagip nga idi kalman ket nasenstensyaan ti reclusion perpetua ti tallo a kangrunaan a suspek nga adda pakainaiganna iti ipupusay ti kadete nu sadino dua kadagitoy ket guilty iti murder bayat a guilty iti hazing ti maysa pay.
Dagitoy da former PMA 3rd Class Shalimar Imperial Jr., Felix Lumbag Jr., ken 3rd Class Julius Carlo Tadena.
Malaksid iti dayta, agbayad ni Imperial ken Lumbag ti P185-K in damages bayat a P2-million in damages kenni Tadena.
Maipalagip a pimmusay ti 20-anyos a ni Darwin idi September 18, 2019 gapu iti nakaro a panakadunor a nasagrapna manipud kadagiti upperclassmen daytoy.
Kabayatanna, apela ni Dexter a maurnos ti sistema ti Phlippine Military Academy tapno maipasigurado nga applicable ti linteg ken mabaliwan ti panagpampanunot dagiti sumagmamano nga alumni seknan iti panangipalubosda ti hazing iti uneg ti akademya.
