BAGUIO CITY – Kiniddaw manen ti ama ti Baguio ti panagpalawag ti Department of Public Works and Highways (DPWH) – Cordillera seknan iti substandard a proyekto dagitoy iti Busol Watershed.
Kiniddaw daytoy ni Mayor Benjamin Magalong kasaruno ti panangkwestionar met ti DPWH-Cordillera iti nagbalin a basaranna iti panangibagana a substandard ti nasao a proyekto ti ahensia.,
Iti interview ti Bombo Radyo Baguio, impettengna nga adun dagiti proyekto ti DPWH-Cordillera ti saan a pimmasa iti standard a proyekto.
Dinakamatna a dumanon iti 50% kadagiti proyekto ti nasao nga ahensia ti naisubli gaputa saan a maaramat dagitoy wenno kaar-aramid laeng ket dagus a nadadael.
Innayonna a panawenen tapnu lukatan ti DPWH-Cordillera ti mata ken panunutda tapnu maaramidda nga umno ti trabaho dagitoy.
Inyunay-unayna a nasken a saan nga urayen ti ahensia a daytoy a mismo ti agwanawan kadagiti proyekto dagitoy.
