Maal-allukoy dagiti residente iti siudad ti Baguio nga agalada iti building permitda.
Iti panakiuman ti Bombo Radyo kenni Engr. Bonifacio Dela Peña, City Administrator iti siudad, kinunana a maymaymayat nu maaddaan dagitoy iti building permit gapu ta pamaneknek a tagikuada ti nasao a residential building wenno anyaman a pasdek.
Sigun kenni Dela Peña, ti building permit ket wagas a manglegalize iti pasdek dagitoy tapno mabalin a maipatawidda daytoy kadagiti sumarsaruno a henerasyon ken tapno saan a makuwestionar ti kinaligalna kasta met a tapno makita nu natalged daytoy a pag-iyanan.
Kabayatanna, kinuna ni Dela Peña a maipaay ti “notification of violation” kadagiti saan nga ag-comply iti daytoy ken mangnamnama ti nasao nga opisyal a saan daytoy nga umabot iti demolisyon.
Nu pay kasta, saan a mailibak a ti nangina a singar iti fee para iti panakaproseso ti building permit ket isu ti maysa nga arungaing dagiti residente iti siudad rason a kiddaw ti opisyal a saan kuma nga abusoen dagiti propesyonal daytoy ken nu mabalin ket maipababa ti fee iti daytoy.
