BAGUIO CITY – Guyguyogoyen ti DSWD-Cordillera ti panagpabakuna dagiti benepisyaryo ti 4Ps wenno Pantawid Pamilyang Pilipino Program kasaruno ti singasing ti DILG a “no vaccine, no subsidy.”
Iti panakiuman ti Bombo Radyo Baguio, kinuna ni DSWD-CAR Regional Director Arnel Garcia a pagsayaatan ti nasao a singasing gaputa maprotektaran ti pamilya dagiti benepisyaryo kontra iti virus.
Impettengna a wagas laeng ti gobierno ti “no vaccine, no subsidy” tapno maallukoy ti panagpabakuna ti publiko kontra iti COVID-19.
Gapu iti daytoy, kinuna ni Garcia a saanda nga urayen a mapagbalin a linteg ti “no vaccine, no subsidy” policy kadagiti 4Ps beneficiary sakbayda nga agpabakuna.
Kinunana nga agtultuloy latta met ti panangipaayda ti cash assistance kadagiti benepisyaryo, nabakunaan man dagitoy wenno saan.
Dinakamatna a puntirya ti ahensia a mabakunaan ti 54,668 a pakabuklan a benepisyaryo ti 4Ps iti Cordillera ngem 14% pailaeng ti nabakunaan.
Buklen daytoy ti 21.89% iti Apayao; 15.36% iti Benguet; 14.18% iti Mt. Province, 13.53% iti Baguio City, 4.67% iti Kalinga ken 4.23% iti Ifugao.
Impettengna a nababa daytoy a bilang ngem kinunana a nangatngato latta no idilig iti datus ti daduma a rehion.
Kumpiyansa ni Garcia nga ad-ado pay ti 4Ps beneficiaries iti rehion ti agpabakuna kontra COVID-19.
Impaganetgetna nga idi awan pailaeng ti COVID-19 ket addan ti maikalkalikagum kadagiti 4Ps beneficiary kas ti panagpabakuna dagiti ubbing kontra polio ken measles.
