BAGUIO CITY – Ipalpalagip manen ti Department of Education (DepEd) – Cordillera kadagiti parapubliko a pagadalan iti rehiyon a ti Brigada Eskwela ket voluntary wenno boluntaryo a panagtrabaho.
Inaramid daytoy ni DepEd-Cordillera information officer Georaloy Palao-ay iti panakiyuman ti Bombo Radyo kas sungbat iti reklamo wenno pakaseknan dagiti sumagmamano a nagannak a mandatory ti Brigada Eskwela iti pagadalan ti annak dagitoy.
Kinunana a saan a mandatory wenno kapilitan a maki-brigada ti maysa a nagannak sakbay a maawat iti nasao a pagadalan ti anakna.
Inyunay-unayna a nasken a maawatan dagiti maseknan a parapubliko a pagadalan a saan nga amin a nagannak ket addaan ti waya nga apan makitrabaho iti brigada.
Binalakadanna met dagiti nagannak nga addaan iti nasao a pakaseknan tapnu apanda idanon daytoy iti Division Office ti maseknan a pagadalan.
Innayon ni Palao-ay a no bilang adda dagiti babaydan wenno nasken nga ipan iti pagadalan dagiti nagannak a saan a makapaset iti brigada ket nasken nga adda ti black and white nangruna no napagnunumuan dagitoy ti Parents Teachers Associations.
– ni DepEd-Cordillera information officer Georaloy Palao-ay
Sigun pay kenkuana, nasken a transparent ti pagadalan tapnu ammo dagiti nagannak ti pakaiturongan dagiti ipaayda ken no boluntaryo ti panagited.
