Kinondenar ti Commission on Human Rights (CHR) ita nga aldaw ti panagbomba a napasamak bayat ti misa iti maysa a simbaan idiay Cotabato City.
Sigun iti nasao nga ahensia, saanda a makayatan ti bayolente nga aramid nangruna ti panangpuntiria kadagiti grupo a kas dagiti addaan ti narelihiosuan a pammati.
Maipalagip a nadangran ti dua a babbai bayat ti insidente iti nasao a lugar idi Mayo disi nuebe ti agdama a tawen.
Agtawen ti 40 ken 65 dagiti biktima a nakipaset laeng iti misa idi kellaat nga imbarsak ti saan pay a nabigbig nga indibidual ti granada.
Daytoyen ti maikadua a napasamak ti panagbomba ti simbaan idiay Bangsamoro Autonomous Region in Muslim Mindanao (BARMM)kasaruno ti napasamak a panagbomba idi Disiembre a singko idi napalabas a tawen bayat ti Catholic Mass idiay Marawi City.
Immunan a kinuna ni Presidential peace adviser Secretary Carlito Galvez Jr. kadagiti umili iti Cotabato City ken ti kabangibang a lugar iti Bangsamoro Autonomous Region in Muslim Mindanao (BARMM) nga agtalinaed a nasiput kasaruno paylaeng ti napasamak a panag-atake.
