BAGUIO CITY – Agtaltalinaed a ti probinsia ti Kalinga ti kadakkelan a pagtataudan ti suplay ti marijuana iti rehion Cordillera.
Inaklon daytoy ni PCol. Davey Vicente Limmong, dadaulo ti Kalinga Police Provincial Office iti panakiuman ti Bombo Radyo Baguio kasaruno ti panakadadael dagiti rinibribo a puon ti marijuana nga aggatad ti P28-M manipud iti dua a pagmulaan sadiay Loccong, Kalinga idi kanikadua.
Nupay kasta, kinunana a linawas met ti panangipatungpalda ti marijuana eradication operations sadiay Kalinga.
Dinakamatna nga idi 2019 ket dimmanon iti binilbilyon a pisos ti gatad dagiti marijuana plants a dinadael dagiti otoridad iti serye ti eradication operations dagitoy kadagiti kabambantayan ti Kalinga.
Kinunana a kadagiti siguden a nakaimulmulaan dagiti marijuana ti pakadisdiskobre-anda ita kadagiti parparuten ken ur-uramenda a marijuana plants ken naduktalanda a nanayonan pay dagiti pagmulaan sadiay ti iligal a mula.
Innayonna a posible a rason iti panagmula dagiti umili sadiay iti marijuana ti dakdakkel a mapatpataudda a kwarta no idilig iti mapastrekanda no agmulada ti nateng.
Iti baet daytoy, mangnamnama latta ni Col. Limmong a maisardengen ti panagmula ti marijuana sadiay tapno saan a kababain nga agnanayon a mabigbigbig a numero uno ti Kalinga a pagtataudan ti suplay ti marijuana iti rehion Cordillera.
