Impakaammo ni Senator Panfilo “Ping” Lacson a maituloy ti sumaruno a panagdengngeg iti Senate Blue Ribbon Committee seknan kadagiti naanomalyaan a flood control projects inton January 19.
Manamnama a mangrugi daytoy iti ala una iti malem.
Sigun kenni Senator Lacson, ipaayanda manen iti subpoena dagiti indibidwal nga immunan nga inimbitaranda iti panagdengngeg ngem saan a dimmar-ay.
Karaman kadagitoy da sigud nga Ako Bicol Party-litst representative Elizaldy “Zaldy” Co, sigud a Department of Public Works and Highways (DPWH) Secretary Manuel Bonoan,sigud nga Undersecretary Trygve Olaivar, ken ni Meynard Ngu.
Impetteng ti senador a nu saan pay nga umatendar dagitoy iti panagdengngeg ket irekomendarna ti panakaipaiyulog iti warrant of arrest para kadagitoy.
Malaksid kadakuada, posible pay a maimbitaran ni Batangas First District Representative Leandro Leviste gapu ta sigun kenni Senator Lacson, adda ti nagpadaan dagiti dokumento nga iggemna ken ti Cabral Files a kinuna ni Leviste a naalana ken daydi sigud a DPWH Undersecretary Maria Catalina Cabral.
