BAGUIO CITY – Ad-adda a lumatak ti munisipyo ti La Trinidad sadiay Benguet no mapapigsa ken maital-o ti coffee production sadiay.
Inanama daytoy ni Department of Tourism (DOT) – Cordillera Regional Director Jovy Ganongan kagiddan ti panakarambak ti Coffee Week ti munisipyo ita a lawas.
Impasiguradona ti panangtulongda iti La Trinidad tapnu mapapigsa ti tourism aspect ti coffee production sadiay babaen iti panangipatungpalda ti libre a panagsanay ken nagduduma nga aktibidad para iti capacity building.
Sigun kenkuana, no mapapintas ti packaging ken ti kalidad ti kape a mapataud iti munisipyo ket dakkel ti posibilidadna a mabigbig ti La Trinidad iti nasao a produkto.
Dinakamatna nga iti agdama ket mangrugrugi paylaeng dagiti entreprenuers, partikular dagiti coffee growers sadiay.
Innayon ni Ganongan a mabalin metlaeng a mapagbalin a destinasyon dagiti turista dagiti pagmulaan ti kape malaksid iti wellness tourism a pakaitampokan dagiti nagduduma a produkto a maaramid manipud iti kape.
Iti agdama, agserserbi a kangrunaan a produkto ti La Trinidad, Benguet ti strawberries, cutflowers ken kape.
