BAGUIO CITY – Naipanamnama ti panagkaykaysa dagiti regional offices ti Philippine Drug Enforcement Agency para iti kampanya dagitoy kontra iti iligal a droga.
Kasaruno daytoy iti panakakemmeg ti maysa a drug personality ditoy syudad ti Baguio a nakaimet ti nasurok 10 a gramo ti mapapati a shabu a nagtaod pay sadiay Region 1.
Sigun kenni PDEA-Cordillera Regional Director Gil Castro, nakadepende ti operasyon dagiti drug personalities iti kaadda ken demand dagiti kontrabando isut gapu a saan a maliklikan iti panag-cross border dagitoy kadagiti probinsya.
Kinunana a gapu iti daytoy ket kasapulan met ti nainget a koordinasyon dagiti operatibo tunggal rehiyon tapnu magun-odda ti tarigagay dagitoy a madalusan ti pagilian kontra iti iligal a droga.
Immunan a dinakamatna a maibilbilang ti Baguio kas consumer city iti iligal a droga gapu ta awan ti makumkumpiskar a dadakkel a suplay ti iligal a droga ken dagiti laeng maal-ala kadagiti drug personalities ket dagiti droga a nagtaud pay manipod iti sabali a lugar.
