BAGUIO CITY – Agtaltalinaed a dagiti kaso a panaglabsing iti Anti-Bouncing Check Law ken ti estafa ti kaaduan a kaso a naaw-awat ti Baguio City Prosecutor’s Office iti umuna a kwarter ti agdama a tawen.
Sigun kenni Assistant City Prosecutor Conrado Catral, iti umuna a kwarter ti agdama a tawen ket dumanon iti 87 a kaso ti panaglabsing iti Anti-Bouncing Check Law ti narisut ti opisinada ken naisumitiren iti korte.
Innayonna a dumanon met iti 84 a kaso ti estafa ti impilada iti nagduduma a korte ditoy siudad.
Dinakamatna a ti nagduduma a kita ti panagtakaw ti maikatlo a kaaduan a kaso ditoy siudad a sinaruno ti 17 a kaso ti panaglabsing iti Anti-Violence Against Women and Children Act.
Nupay kasta, inaklon ni Catral nga adda ti panagngato iti kaso ti panagrames iti umuna a kwarter ti agdama a tawen a dimmanon iti 12, pakairamanan ti innem a kaso ti panagrames a konektado iti Anti-Child Abuse Law malaksid iti 11 a kaso ti child abuse.
Dinakamatna pay nga iti umuna a kwarter ti agdama a tawen ket dua a kaso ti naipila kontra kadagiti natiliw iti anti-drug operations.
