BAGUIO CITY – Saanen a naklaat ni Tabuk City, Kalinga Mayor Darwin Estrañero iti panagngato ti kaso ti COVID-19 sadiay.
Imbinglay ti mayor iti panakiyuman ti Bombo Radyo Baguio a resulta daytoy iti agtultuloy a panakaipaawid dagiti Locally Stranded Individuals (LSIs) sadiay Tabuk City manipud kadagiti nagduduma a lugar ditoy pagilian.
Kinunana nga iti agdama ket dumanonen iti 25 ti kaso ti COVID-19 sadiay Tabuk City, no sadino 19 kadagitoy ti naimbagan ken 6 ti aktibo a kaso.
Gapu iti daytoy, kinunana a timtimbengen itan ti lokal a gobierno ti bilang dagiti LSIs a mapalpalubosan nga agawid iti siudad nangruna ta a mapaplano ti panakanayon dagiti quarantine facility para kadagiti LSIs.
Dinakamatna a makikokoordinardan iti Department of Education kalpasan a naaprobaran ti kiddawda maaramat dagiti pagadalan iti siudad kas temporaryo a quarantine facility dagiti LSIs ken mapaawid nga OFWs.
Malaksid iti daytoy, panggep pay ti lokal a gobyerno ti Tabuk City a mangipatakder iti kanayunan nga isolation facility a maipasdek kadagiti bakante a lote a tagikua ti gobyerno.
Kagiddan iti daytoy, naminsan manen a pinalagipan ni Mayor Estrañero dagiti umili sadiay Tabuk City, Kalinga para iti panagtulnogda kadagiti paglintegan tapnu maliklikan ti panakaiwaras ti COVID-19 kas iti umno a panangisuot iti facemask, panagbuggo iti ima, panagaramat iti alcohol ken sanitizer ken panagobserbar iti social distancing.
