Imbinsa-binsa ni Baguio City Mayor Benjamin Magalong dagiti kangrunaan a progreso ken plano dagitoy iti pagsaayatan ti siudad ti Baguio bayat ti State of the City Address-na itay agsapa kagiddan ti selebrasyon ti maika-116th Baguio Charter Day.
Impaganetget ti Mayor a ti panangtutok iti sustainability, digital innovation ken disaster resilience ket maysa kadagiti tulbek ti panagrang-ay ti siudad.
Impettengna metlaeng nga ipagpaganetget dagitoy ti food security babaen iti Smart Farming initiative a mangiyamyammo iti solar-powered hydroponics sadiay Pinsao Proper ken Dontogan no sadino panggep dagitoy a mangipasdek iti greenhouses para iti strawberry production.
Gapu iti dayta, agkidkiddaw dagitoy iti national government iti pundo tapno mapalawa ti nasao a programa.
Kinunana metlaeng a kas paset ti Open Government Partnership, panggep ti City Government nga adaptaren ti blockchain technology para iti government documents, pakairamanan ti financial records, bidding processes, ken infrastructure reports.
Malaksid iti dayta, kitkitaen metlaeng ti lokal a gobierno dagiti dadakkel a proyekto kas iti Market Redevelopment, Asin Hydro, ken ti Smart Urban Mobility.
Kabayatanna, impetteng ni Mayor Magalong a ngimmato ti ekonomiya ti siudad ti Baguio iti 9% growth rate, 97.5% ti employment rate, ken bimmaba ti poverty incidence iti 0.5%.
Immunan metlaeng a napadayawan ti siudad iti 2025 Bloomberg Award for Tobacco Control ken ti Gold Seoul Smart City Award.
Kabayatanna, kinunana a ti panagprogreso ket nakadependar iti active citizenship ken ti collective responsibility, rason a nagballaag daytoy kontra iti korapsyon.
