BAGUIO CITY – Ibalbalaag ti Baguio City Police Office iti publiko nangruna kadagiti umili ken negosyante iti doble a panagridam kontra kadagiti street crimes ditoy syudad.
Iti pannakiyuman ti Bombo Radyo Baguio ken BCPO Information Officer PLtCol. Judy Jasmine Palicos, kinunana a naobserbaran iti ngimmato a bilang dagiti street crimes ditoy syudad a kas iti shoplifting, pickpocketing ken snatching kagiddan iti pannakaipasidong ti syudad iti Alert Level 1.
Gapu iti dayta, iyap apelana kadagiti establishment owners iti kooperasyonda kadakuada kasta metten iti pannangimuntarda iti CCTV cameras iti pwesto dagitoy.
Inlawlawagna a dakkel a tulong daytoy a mangsolbar kadagiti nasao a kaso.
Kagiddan iti dayta, kinunana a kanayun ken karaman iti panagbagbagada kadagiti turista iti ilalabasda kadagiti checkpoints iti panagannad ken panagridamda kontra kadagiti nasao a krimen.
Nupay kasta, inaklonna a saan a maliklikan nga adda dagiti mabiktima iti daytoy.
Inlawlawagna pay a dagiti nailista a kaso ket saan a napasamak kadagiti lugar a pakaisaysayangkatan dagiti kangrunaan nga aktibidad iti syudad agsipod ta mapaspasamak daytoy kadagiti dadduma a lugar ken babbarangay.
Iti baet ti daytoy, inpanamnama ni Palicos iti pannakadoble ti panagwanawan nga ar aramidenda tapnu maliklikan ti pannakailista dagiti nasao a kaso iti syudad ken mapagtalinaed ti linak ken kapya iti Baguio City.
