BAGUIO CITY – Nainget a palpalagipan manen ti Office of Civil Defense (OCD) – Cordillera dagiti umili iti rehion iti panagridamda ken ti dagus a panagbakwit kagiddan ti mapaspasaran a napigsa a panagtudona iti nagduduma a paset ti rehion.
Iti interview ti Bombo Radyo Baguio, kinuna ni OCD-Cordillera Operations Officer Frankie Cortez nga agtultuloy a mapaspasaran ti panagtudo iti nagduduma a probinsia ti Cordillera gapu iti habagat a pappapigsaen ti bagyo a Fabian.
Kinunana a gapu iti saan a napintas a sasaaden ti panawen ita ket addan dagiti babassit a panagreggaay ti daga a nailista iti sumagmamano a paset ti Cordillera .
Karaman kadagiti nailistada nga insidente ket ti panakagabur ti maysa a balay sadiay Balbalan, Kalinga; ti panagreggaay ti daga iti deppaar ti Bubon Virac- Kias Road sadiay Itogon, Benguet ken ti panagreggaay ti daga iti Benguet-Nueva Vizcaya Road partikular iti deppaar ti Tocmo, Loacan, Itogon, Benguet
Nairikep met iti trapiko ti tallo a section ti Abra-Kalinga Road, partikular sadiay Duldulao ken Gacab, Malibcong, Abra gapu iti panagreggaay ti daga ken saan a maipatungpal dagiti otoridad ti panagdalus gapu iti kinapeggad ti sitwasyon sadiay.
Agtaltalinaed pay a normal ti lebel ti danum iti Ambuklao Dam ken Binga Dam sadiay Benguet bayat nga awan kadagiti kangrunaan a kalsada iti rehion ti nakarikep iti trapiko malaksid laeng iti Kennon Road a nakalukat para laeng kadagiti residente iti masakupan ti nasao a kalsada.
Impasigurado metlaeng ni Cortez nga addan dagiti nakasagan a food ken non-food items iti nagduduma a lokal a gobyerno iti rehion a maiwaras kadagiti agkasapulan.
