Maitabonen ita nga aldaw ni Pope Francis iti Basilica of St. Mary Major idiay Rome, Italy.
Sigun iti report, naituding daytoy a maitabon 10 AM iti oras sadiay Vatican wenno 4:00 PM, oras iti Pilipinas.
Nalpas metten a nairekep ti lungon daytoy idi rabii nu sadino, naangay ti pribado a seremonya nga inatendaran dagiti opisyales iti Vatican ken sumagmamano kadagiti miembro iti pamilya iti Santo Papa.
Ti funeral mass a maangay idiay St. Peter’s Square ket idauloan ni Cardinal Giovanni Battista Re, ti Dean iti College of Cardinals.
Kasaruno ti misa, mangrugi metten ti siam nga aldaw a mourning period ken ti panakaidulin ti bagi ti Santo Papa iti Basilica of St. Mary Major.
Kabayatanna, agturong met idiay Vatican dagiti dadaulo iti nagduduma a world leaders para iti panakaitabon ni Pope Francis, maysa kadagiti maibilbilang a kadaklan a diplomatic gatherings.
Iti inisyal a datos,agturong ti pito a dadaulo manipod Asia-Pacific pakairamanan ni Philippine President Ferdinand Marcos Jr., walo manipod America pakairamanan da United States President Donald trump ken ti predecessor daytoy a ni Joe Biden, 46 manipod Europe pakairamanan ni Ukraine President Volodymyr Zelensky, Russia Culture Minister Olga Lyubimova, ken United Kingdom Prince William, pito met manipod Middel East, 14 manipod Africa, ken dua nga international organization pakairamanan ni United Nations Secretary General Antonio Guterres.
