BAGUIO CITY – Nakasaganan ti Philippine Military Academy (PMA) iti maisayangkat a homecoming dagiti alumni daytoy inton Sabado iti baet ti panagrikep ti akademya manipud iti general public gapu iti pangta ti coronavirus disease – 2019.
Iti panakiyuman ti Bombo Radyo kenni Capt. Cheryl Tindog, panakangiwat ti PMA, kinunana nga addan dagiti proactive measures a maaramid tapnu maipasigurado ti kinatalged dagiti kadete ken dagiti agtatrabaho sadiay.
Sigun kenkuana, kasapulan nga adda ti vehicle pass dagiti lugan dagiti alumni ken pamilya dagitoy a sumrek iti akademya ken maipasidong pay dagitoy iti thermal scan.
Dinakamatna a saan a mapalubusan a makastrek iti uneg ti PMA dagiti makitaan ti gurigor ken dadduma pay a sintomas.
Innayonna nga agbalin pay a limitado ti exposure dagiti kadete kadagiti agturong a dumar-ay iti alumni homecoming.
Sigun pay kenni Capt. Tindog, eksklusibo ita ti homecoming kadagiti cavaliers ken pamilya dagitoy kas paset ti proactive measure isut gapuna a saan metlaeng a mailukat kadagiti kameng ti media ti nasao nga aktibidad.
