Naituding a mangrugi ti training iti umuna a lawas iti Pebrero dagiti agserbi kas election officers ken electoral boards iti 2025 Midterm Elections.
Iti panakiuman ti Bombo Radyo kenni Atty. Elenita Julia Tabangin-Capuyan, Provincial Election Supervisor 3 iti Office of the Regional Election Director-Cordillera, kinunana a kalpasan a masuroan dagiti election officers, sumaruno met a maisuroan dagiti mannursuro nga agserbi kas electoral board inton eleksyon.
Sigun kenni Atty.Tabangin-Capuyan, ad-ado dagiti agserbi kas electoral board ita nga eleksyon gapu ta nanayunan ti bilang dagiti rehistrado a botante rason met nga ad-ado a makina ti maaramat.
Innayon ni Atty. Tabangin-Capuyan a maur-uray pay ti maipaiyulog a pammilin nu maigiddan dagiti pulis nga agserbi kas electoral boards iti nasao a training.
Iti sabali a bangir, nagpalagip ti opisyal maipapan iti maiparit nga aramiden nu panawen ti eleksyon kas iti panangiwaras iti t-shirts, headband,payong ken daduma pay a kagawaan nga addaan kadagiti naimprenta a nagan dagiti kandidato.
Nupay kasta, maur-uray paylaeng ti panakaipaiyulog iti Kontra Bigay resolution iti Commission on Elections a mangipawil iti panangiwaras ti kandidato kadagiti banbanag a mabalin a makaimpluwensya kadagiti botante.//Bombo Mera Pacpacan
