Nagballaag ti Land Transportation Franchising and Regulatory Board (LTFRB) kadagiti public utility vehicle (PUV) drivers ken operators kontra iti panagsingirda iti a doble a plete kadagiti pasaheros a maibasar iti pisikal a langa, “size,” ken timbang.
Inruar ti nasao nga ahensia ti statement kalpasan a nakaawatda iti sumagmamano a reklamo a mangibagbaga a dagiti “overweight” wenno “plus-size” a pasahero ket masingsingir iti plete a nasurok pay iti naikeddeng nga standard rate.
Ti nasao a “practice,” sigun iti nasao nga ahensia, ket “discriminatory” ken saan a nainkalintegan.
Impaganetget ti Land Transportation Franchising and Regulatory Board iti public transportation a rumbeng nga “accessible” ken “respectful” daytoy iti amin.
Impakaamo pay ti nasao nga ahensia a ti aniaman a kita ti manipulasion ti plete a nakabasar iti personal a kababalin, agraman ti kadakkel ti bagi, ket nalawag a panaglabsing kadagiti pagannurotan ti LTFRB ken prinsipio ti karbengan ti tao.
Dagiti aglabsing ket mabalin a sumango kadagiti penalty agraman ti multa, pannakasuspindir ti operasion, wenno revocation ti prangkisada a maitunos iti agdama a linteg ken pagannurutan ti LTFRB.
Kabayatanna, idagdagadag ni Guadiz kadagiti pasaheros a makapaspasar iti aniaman a kita ti “overcharging” ken diskriminasion ket dagos nga ireport ti insidente babaen iti LTFRB hotline 1342 wenno iti official social media pages daytoy.
