BAGUIO CITY – Insingasing ni Baguio City Councilor Leandro Yangot Jr. ti panagsingir iti P50 a congestion fee kadagiti turista a mangitugot iti luganda pastrek iti siyudad.
Sigun kenni Yangot, sinuportaran metten dagiti padana a konsehal ti nasao a singasing.
Mailaksid ditoy dagiti residente ti La Trinidad – Itogon – Sablan – Tuba – Tublay (LISTT) areas ngem posible pay a mailaksid dagiti amin a residente iti Cordillera.
Inlawlawag ni Councilor Yangot a babaen iti daytoy ket masolusyonan ti nakaro a parikut iti trapiko iti siyudad.
Agtultuloy met ti operasyon ti HOHO bus tunggal weekends tapno maksayan ti nailet unay a gunay ti trapiko iti Baguio City.
Ti nasao a bus ket pagluganan dagiti turista nu agpasyar da kadagiti nagduduma a destinasyon iti siyudad nu sadino iparada da dagiti lugan da iti Baguio Convention Center.
